Gibutyag sa kanhing State Auditor sa Commission on Audit–Intelligence and Confidential Fund Audit Office (COA-ICFAO) nga si Roderick Wamil nga moabot sa P40 milyon gikan sa confidential funds ni Vice President Sara Duterte ang gigamit alang sa medical ug food aid.
Base sa mga resibo nga gisumite sa Office of the Vice President (OVP), migawas nga ang maong pondo gigahin alang sa mga transaksyon nga, sumala ni Wamil, wala gitugotan ubos sa kasamtangang mga regulasyon sa paggamit sa confidential funds.
Matud ni Wamil, ang paggamit sa confidential funds alang sa medical ug food aid klaro nga supak sa maong mga regulasyon.
Ang mga resibo nga gipresentar sa Impeachment Court naglangkob sa mga ngalan sa mga giingong benepisyaryo ug sa kantidad nga ilang nadawat, lakip sila sila Mary Grace Piattos (P70,000), Nova Piattos (P85,000), Renan Piattos (P110,000), Andy Lim (P50,000), Alejandro Pikit (P90,000), Feonna Biong (P80,000), Sisfrunio Balsac (P70,000), Mico Harina (P295,000), Janice Marie Revilla (P70,000), Patty Ting (P70,000), ug Gabriela Bisaya (P150,000).
Sumala sa House prosecution panel, opisyal ang maong mga dokumento ug adunay pirma ni Vice President Sara Duterte.
Dugang ni Atty. Lorna Kapunan nga ang bise presidente mismo ang miaprubar sa maong mga transaksyon.
