Gihulagway sa House prosecution nga “very alarming” ang 319.33 milyones ka pesos nga mga remittance gikan sa China ug Hong Kong nga nadawat sa Cale88 Foods Corporation, usa ka kompanya nga nalambigit kang Manases “Mans” Carpio, ang bana ni Vice President Sara Duterte.
Matod sa Prosecution panel, mas makapabalaka kini nga sitwasyon tungod kay ang pipila sa mga kompanya nga nagpadala og pondo ngadto sa Cale88 konektado sa mga negosyo nga gipanag-iya sa gobyerno sa China.
Nagpahayag si House Deputy Speaker Paolo Ortega nga angay kining ipailalom sa mas lawom nga imbestigasyon, samtang namahayag siHouse impeachment team spokesperson Ace Barbers, nga kinahanglang masuta kung aduna bay mga balaod nga nalapas.
Hinuon, giklaro ni Barbers nga ang pagdawat og pondo nga gikan sa China dili awtomatikong ilegal; gikinahanglan una nga masuta ang gigikanan sa pondo, ang katuyoan sa mga bayad, ug kung kinsa ang katapusang makadawat niini.
Samtang, nagpahayag ang Anti-Money Laundering Council (AMLC) nga kinahanglan pa niining susihon ang mga impormasyon nga may kalabotan sa maong mga transaksyon.
