Gidepensahan sa House prosecution panel ang mga prosecutors niini batok sa mga kritisismo sa ilang pamaagi sa pagpresentar sa impeachment case batok kang Vice President Sara Duterte.
Matod ni Rep. Zia Alonto Adiong, spokesperson sa House prosecution panel, sa pakighinabi sa bombo newsteam nga nagbuhat og tarong sa ilang trabaho ang mga prosecutors ug gituman nila ang ilang constitutional duty.
Mitumong ang iyang komento sa mga memes ug social media posts nga nagpunting sa physical appearance ug manner of speaking sa pipila ka prosecution members.
Sumala ni Adiong, lain-lain man ang perception sa publiko, ug bisan pa niini, adunay mga senator-judge nga mipahayag usab sa ilang pag-appreciate sa performance sa mga miyembro sa prosecution panel.
Gihangyo ni Adiong ang publiko nga i-focus ang paghisgot sa merits sa kaso ug sa ebidensiya, imbes nga sa physical appearance o personal nga pamaagi sa pagpresentar sa mga prosecutors.
Matod niya, ang ingon nga mga pag-atake, ilabina kung nagpunting sa mga babayeng prosecutors, mahimong mosangpot sa isyu sa misogyny.
Gipasiugda ni Adiong nga dili ang physical appearance o demeanor sa mga prosecutors ang subject matter sa impeachment trial, kundili kung unsa ang ilang mapamatud-an pinaagi sa mga ebidensiya nga ilang ipresentar sa impeachment court.
Giingon pa niya nga importante nga mahatagan og higayon ang mga ebidensiya nga maoy mosulti ug mahimong basehan sa paghusay sa mga alegasyon batok sa bise presidente.
