Gitan-aw sa House prosecution panel nga personal nga rason ang posibleng hinungdan sa pag-atras ni kanhi Senador Antonio Trillanes isip prosecution witness sa impeachment trial ni Vice President Sara Duterte.
Matod ni Rep. Zia Alonto Adiong, spokesperson sa House prosecution panel, sa pakighinabi sa bombo newsteam nga nakurat usab ang pipila ka miyembro sa prosecution sa kalit nga pag-withdraw ni Trillanes isip witness, tungod kay gilauman nilang mopadayon kini sa pagpresentar sa iyang testimonya.
Sumala ni Adiong, ilang respetohon ang desisyon sa kanhi senador ug gilauman nga masabtan pa sa publiko ang iyang mga rason pinaagi sa iyang kaugalingong pagpahayag.
Samtang, gipaabot sa prosecution ang pagpresentar sa Anti-Money Laundering Authority o AMLA records, nga mahimong magpakita sa mga transaksiyon ug money trail nga ilang gisusi kalabot sa mga account nga nalambigit sa Vice President.
Matod ni Adiong, makatabang ang maong records sa ilang pagtan-aw kung unsa ang tinubdan sa mga pondo ug kung kompleto ba ang pag-disclose sa mga assets sa SALN.
Gisupak usab sa prosecution ang objection sa defense batok sa paggamit sa AMLA records tungod sa confidentiality ubos sa Anti-Money Laundering Law ug Bank Secrecy Law.
Giingon ni Adiong nga dili absolute ang confidentiality kung adunay legal nga proseso, lakip ang gahum sa korte sa pagpangayo o pag-subpoena sa mga dokumentong gikinahanglan alang sa kaso.
