Miinsistir ang House prosecution panel nga aduna silay igo nga mga dokumento ug ebidensya aron suportahan ang pasangil sa wala matino nga bahandi batok kang Vice President Sara Duterte.
Sumala ni Lanao del Sur Rep. Zia Alonto Adiong, anaa sa prosekusyon ang mga rekord sa bangko ug buhis nga gi-subpoena may kalabotan kang Duterte ug sa iyang bana, lakip ang mga financial records sa ilang mga kompanya.
Sa maong artikulo, giakusahan si Duterte sa paglapas sa Konstitusyon ug paglapas sa public trust tungod sa giingong pagbaton og bahandi nga dili motakdo sa iyang legal nga income, ingon man sa kakulang sa deklarasyon sa pipila niyang kabtangan ug business interests.
Wala gibutyag ni Adiong ang mga detalye sa ilang ebidensya, apan miingon siya nga ipresentar kini sa publiko kung moabot na sa Senate Impeachment Court ang proceedings alang sa maong artikulo.
Samtang, gitapos na sa prosekusyon ang presentasyon sa ebidensya alang sa Article I, nga may kalabotan sa giingong sayop nga paggamit sa P612.5 milyon nga confidential funds sa Office of the Vice President ug Department of Education.
