Gipaambit sa House prosecution panel nga 70 porsyento na silang kompleto sa pagpresentar og ebidensya sa confidential funds article o Article 1 kalabot sa nagpadayon nga impeachment trial batok kang Bise Presidente Sara Duterte.
Sumala sa tigpamaba sa panel nga si Representative Renee Co, ang mga prosecutor malampusong nakapresentar og daghang mga dokumento ug gikinahanglan nga mga saksi sa impeachment court aron pamatud-an ang giingong anomalosong paggamit sa Bise Presidente sa iyang confidential ug intelligence funds.
Ang target sa panel mao ang hingpit nga pagtapos sa pagpresentar sa maong artikulo karong Miyerkules, Setyembre 9, subay sa naunang manifestation nga gisang-at sa prosekusyon sa Senado.
Gipasiugda ni Co nga ang hearing klaro nga nagpintal sa tibuok hulagway sa giingong dili madawat nga paggasto sa publikong pundo, nga mahimong ikonsiderar nga pagbudhi sa pagsalig sa publiko ug klaro nga basehan sa impeachment.
Aron mapalig-on pa ang kaso sa dili pa tapuson ang unang artikulo, gipasalig sa tigpamaba nga magdala sila og dugang nga mga importanteng saksi nga adunay direktang kahibalo sa mga transaksyon ug paggamit sa publikong pundo sa Office of the Vice President.
Sukad nagsugod ang hearing, ang House panel nakapresentar na og mga kwalipikadong saksi lakip na ang duha ka bank managers gikan sa mga bangko sa gobyerno, duha ka auditors gikan sa Commission on Audit (COA), duha ka opisyal sa militar, ug duha ka kanhing ehekutibo nga nagserbisyo ubos ni Duterte.
