Giawhag ni House Prosecution Counsel Atty. Lorna Kapunan ang Senado nga magpabiling safe space alang sa mga kababayen-an, human sa komento ni Senator Raffy Tulfo nga naghulagway sa usa ka abogado nga daw “pa-cute” samtang nagpangutana sa usa ka saksi atol sa impeachment trial ni Vice President Sara Duterte.
Matod ni Kapunan, posible nga aksidente lang o “slip of the tongue” ang pahayag ni Tulfo, apan gipahinumdoman niya ang tanan nga ang Senado mismo ang nagpasar sa Safe Spaces Act o nailhan usab nga Bawal Bastos Law.
Gihatagan og gibug-aton ni Kapunan nga kinahanglan magpabilin ang Senado nga luwas nga palibot alang sa mga babayeng abogado ug uban pang kababayen-an nga miapil sa mga hearing, lakip na ang mga senior citizen.
Ang Republic Act 11313, o ang Safe Spaces Act, nagtumong sa pagsulbad sa gender-based sexual harassment sa mga pampublikong lugar, online platforms, trabahoan, ug mga institusyon sa edukasyon.
Niadtong Enero 2025, giaprobahan sa Senado sa ikatulo nga pagbasa ang usa ka balaodnon nga nagtinguha sa pagpalig-on niini nga balaod.
Kahinumdoman nga gisaway ni Senator-Judge Raffy Tulfo ang prosecution panel tungod sa giingong pagpresentar og mga saksi nga dili kinahanglan ug tungod sa estilo sa pagpangutana sa pipila ka mga abogado.
Giawhag niya ang prosecution nga sigurohon nga ang matag saksi makahatag og bililhong impormasyon ug likayan ang paghimo sa impeachment proceedings nga mahisama sa “courtroom drama” o usa ka variety show.
