CEBU CITY – Patay ang lalaki nga anak human gidunggab sa iyang amahan sa Grandchina, Brgy. Mantalongon, Dalaguete, sa Cebu.
Giila ang 71- anyos nga suspek nga si Mariano Dicdican samtang ang 35 anyos nga biktima mao si Dionesio Dicdican.
Matud ni Police Corporal Gerson Alcantara sa Dalaguete Police Station nga miabot ang anak nga si Dionesio sa ilang panimalay ug kalit nga gidunggab sa amahan nga si Mariano ang iyang anak gamit ang kitchen knife.
Nakahiagum ang anak og samad-dinuggaban sa tuo’ng bahin sa iyang tiyan ug nakahigayon pa kini og dagan aron magpatabang sa silingan. Apan wala na kini gidala sa tambalanan tungod sa iyang hinanaling kamatayon.
Dugang pa ni Corp. Alcantara nga adunay panagbangi ang mag-amahan ug wala pa kini ma-settle sa barangay.
Wala usab matino sa kapulisan ang gi-awayan sa duha nga miresulta sa maong krimen.
Nabalhog ang suspek nga si Mariano sa detention cell sa Dalaguete Police Station.
Samtang gihuwat pa sa buhatan sa kapulisan kung mopasaka og kasong parricide ang pamilya batok sa amahan.
