Gikabutyag ni Ellen Maghanoy, ang Presidente sa Federation Of Cebu Transport Cooperatives, nga ang miyembro sa primary cooperatives ug mga transport cooperatives gituohang gaping-it na sa kalisud, nag negative na ang kita, o halos wala nay kita ang mga drivers ug operators tungod sa padayong pagsaka sa presyo sa lana sa kasamtangan.
Busa, gikanayon ni Maghanoy nga ang ilahang gibuhat karon, ang ubang drivers, operators, ug transport cooperatives nagbyahe nalang ginagmay aron aduna lay makaserbisyo sa matag rota niini.
Mao kini ang gipasabot ni Maghanoy, atol na sa eksklusibong pakighinabi sa Bombo Radyo Cebu team kaniya, ug iyang gidugang nga minus na karon ang gabyahe ug maka ingun nga dili “totally” o 100% deployment sa mga pamasaheroang sakyanan.
Busa sa karon, gibana-banang anaa nalang sa 50% ang gideploy sa kadalanan.
Subay niini, gitino ni Maghanoy ang pinaka komon nga problema ug hagit nga nahimamat nila mao ang kataas sa presyo sa Diesel, gumikan kay kung intandi, kaniadto, ang presyo sa diesel anaa lang sa 50-55 pesos matag litro.
Apan sa kasamtangan, anaa na sa 150 pesos matag litro diin diperensyada na kini og 100 o kapin sa gatos ka pesos, ug mao kini ang nakahatag nila og tumang kalisud.
Dugang niini, giasoy ni Maghanoy nga ang ilahang gibuhat karon, inubanan sa koordinasyon sa National Transport Leaders, adunay ipahigayon nga press conference ug nanawagan ngadto sa gobyerno nga i-roll back ug ibalik ang presyo susama sa 50-55 pesos matag litro alang sa mga Public Utility Vehicles (PUV).
