CEBU CITY- Misalmot na sa service contracting program sa LTFRB ang pipila ka MPUJ operators ug transport cooperatives sa nagkadaiyang dapit sa Cebu, lakip ang Lapu-Lapu City ug Liloan, diin padayon nga ipatuman ang 20 porsyentong diskwento sa plete sa mga pasahero ubos sa programa matag Lunes hangtod Biyernes.
Kini ang gipadayag ni Ellen Maghanoy, presidente sa Federation of Cebu Transport Cooperatives, kinsa mitin-aw nga boluntaryo lamang ang pag-apil sa service contracting program ug dili kini mandatory alang sa tanang operators.
Matud ni Maghanoy, ang programa naglangkob sa government subsidy alang sa mga transport operators ug drayber, samtang gipadayon usab ang kasamtangang mga benepisyo sa mga pasahero, sama sa 20 porsyentong diskwento sa plete alang sa mga estudyante ug ubang kwalipikadong sektor.
Gibutyag usab niya nga ang pipila ka transport cooperatives sa Cebu mipili sa pag-apil aron mapahimuslan ang suporta sa gobyerno, ilabina sa panahon nga daghan gihapon ang mga operator nga naglisod tungod sa taas nga gasto sa operasyon.
Apan, adunay kabalaka ang pipila ka sektor nga wala mosalmot, tungod sa paggamit sa tracking system diin ang bayad ibase sa gidaghanon sa kilometrong matuman sa rota.
Sumala ni Maghanoy, kon adunay teknikal nga problema o dili makompleto ang gitakdang biyahe, posible nga maapektuhan ang bayad sa operator.
Dugang pa, mailhan ang usa ka jeep nga apil sa programa kay adunay nakabutang sa atubangan niini nga “Service Contracting Program” nga nakasulat sa Blue nga marka.
Nagpadayon gihapon ang koordinasyon tali sa mga kooperatiba ug sa LTFRB aron mapalambo ang implementasyon sa programa ug masiguro ang patas nga benepisyo alang sa tanang sektor.
