CEBU CITY- Gihangop sa Federation of Cebu Transport Cooperatives ang pag-apruba sa Department of Transportation o DOTr sa fare increase sa mga public utility vehicle o PUV, nga ipatuman na karong Lunes, Setyember 28, 2026.
Sa pakighinabi sa Bombo Newsteam kang Elen Maghanoy, President sa Federation of Cebu Transport Cooperatives, gipaambit niini nga dako kini og ikatabang sa mga driver ug operator tungod sa padayon nga pagsaka sa presyo sa diesel ug uban pang operational expenses.
Ubos sa bag-ong fare adjustment, P1 ang madugang sa minimum fare sa traditional jeepney, samtang P2 ang increase alang sa modern jeepney.
Matud ni Maghanoy, dugay na nga gihulat sa transport sector ang aksyon sa ilang petition alang sa fare increase, nga kaniadto temporaryo nga gi-hold.
Sumala kang Maghanoy, bisan og adunay dugang sa pamasahe, dako gihapon ang epekto sa mahal nga presyo sa fuel sa income sa mga driver.
Giingon niya nga niabot na sa kapin P100 ang presyo sa diesel, hinungdan nga dako nga bahin sa kita sa mga driver ang gigahin alang lamang sa fuel ug uban pang gasto sa operasyon.
Matud ni Maghanoy, adunay mga driver nga human sa tibuok adlaw nga pagbiyahe, gamay na lamang ang mahabilin nga kita alang sa ilang pamilya.
Sa bag-ong pamasahe, ang minimum fare sa traditional jeepney mahimong P14, gikan sa P13, o P1 nga increase.
Alang sa modern jeepney, mahimong P17 ang minimum fare, gikan sa P15, o P2 nga increase.
Apan gipahinumdoman ni Maghanoy nga dili pa mahimong maningil sa bag-ong pamasahe ang mga driver kung wala pa ang updated fare matrix.
Matud niya, kinahanglan nga adunay hustong fare matrix ang matag unit aron legal nga ma-implement ang bag-ong pamasahe.
Gipasabot ni Maghanoy nga ang fare matrix mahimong ma-download gikan sa website sa Land Transportation Franchising and Regulatory Board o LTFRB.
Busa, bisan pa og magsugod ang fare increase karong Lunes, kinahanglan gihapon nga kompleto ang dokumento ug adunay updated fare matrix ang matag PUV unit.
