Laing pagsaka na usab sa presyo sa mga produktong petrolyo karong semanaha, hinungdan nga gawas sa mga commuters, nagping-it usab ang mga drayber sama nalang sa mga Ride-hailing drivers.
Subay niini, personal nga gisuta sa Bombo Radyo Cebu newsteam ang kahimtang sa mga Ride hailing drivers sa kasamtangan, kung aduna paba silay mabitbit ig uli nila sa matag panimalay, o igo-igo nalang, o kuwangon pa.
Busa, eksklusibong gihinabi sa team si Larry King Villamor usa sa mga driver sa ride-hailing services, ug iyang gibutyag nga bisan aduna pa silay sobra ginagmay sa ilahang kinitaan, apan sa karon, gamay nalang gumikan kay mahal na ang presyo sa gasolina.
Gani, gitandi pa ni Villamor nga kaniadto, sa 200-300 pesos nga kantidad, maka pa full-tank na siya sa iyahang motor, apan karon, dul-an 500 pesos na anha na sila maka pafull-tank.
Hinungdan nga dako kinig kalahian na kompara sauna kay sa kasamtangan, gamay nalang man og subra ang iyahang kinitaan busa gamay nalang siya’g maloklok pauli.
Tungod niini, si Villamor nanawagan sa gobyerno ug nanghinaot nga ma aksyonan kini nga mabalik na o makunhoran na ang presyo sa gasolina, aron maabagan usab sila sa ilahang panginabuhian.
