Gihatagan og katin-awan ni Greg Perez ang Chairperson sa Pinagkaisang Samahan ng mga Tsuper at Opereytor Nationwide Cebu Chapter (Piston-Cebu), nga ang mga nitumaw nga hungihong karon kabahin sa aduna nay ubay-ubay nga mga drayber ang moundang na sa pagpamasada.
Dugang ni Perez, hinuon aduna pay mga namasada apan wala na kini makaabot og gatosan, gumikan kay nanguli nalang usab ang pipila ka mga drayber sa ilahang tagsa-tagsa ka mga probinsya.
Mao kini ang gikompirmar ni Perez sa eksklusibong pakighinabi sa Bombo Radyo Cebu newsteam kaniya, diin ang maong mga kalihokan karon sa transport groups, resulta na sa walay hunong nga pagtaas sa presyo sa petrolyo ug epektibo kini matag adlawng Martes kada semana.
Ingun man nga gitino usab ni Perez nga kasamtangan, ang mga commuters nakasinati na og kanihit sa mga pampublikong sakyanan karon tungod gihapon sa susamang rason, diin ang direktang apektado niini mao ang mga drayber hinungdan nga nihunong na una kini sa pagpamasada.
Ingun man iyaha usab nga gibutyag nga ang problema sa pagkakaron, walay aksyon ang gobyerno subay sa krisis nga gi atubang sa katawhan nunot sa padayong pagsaka sa mga presyo sa lana, ug lakip na usab ang mga batakang palaliton.
