CEBU CITY- Nagpahayag sa kabalaka ug reklamo ang pipila ka mga tsuper sa pampublikong sakyanan sa Cebu kalabot sa kasamtangang sistema sa pag-apod-apod sa cash relief assistance ug fuel subsidy.
Kini human nila giingon nga ang ayuda dili direkta nga ihatag sa mga drayber, kondili moagi pa sa mga operator ug kooperatiba.
Sa pakighinabi sa Bombo Newsteam, si Greg Perez, chairman sa PISTON-Cebu, mipasabot nga ang kasamtangang sistema nagmugna og pagduhaduha sa mga tsuper kon madawat ba nila sa tibuok ang kantidad nga gitagana sa gobyerno.
Sumala sa pipila ka mga drayber, adunay mga higayon nga nadugay ang pag-release sa ayuda, samtang ang uban wala pa gihapon nakadawat bisan gamay nga kantidad hangtod karon.
Gidugang niini, nga mas maayo kon direktangadto sa mga tsuper ihatag ang cash assistance aron malikayan ang mga duda nga adunay kaltas o processing fee nga makapakunhod sa kantidad.
Gawas sa cash relief, gibutyag usab nga ang fuel subsidy program sa gobyerno nakasinati usab og susamang isyu, diin ang mga operator gihapon ang nagkupot sa pondo imbes nga ang mga drayber mismo.
Tungod niini, nanawagan ang sektor sa transportasyon ngadto sa Land Transportation Franchising and Regulatory Board (LTFRB) ug uban pang ahensya nga usbon ug palig-onon ang sistema sa pag-apod-apod aron masiguro nga direkta, patas, ug dinalian nga madawat sa mga tsuper ang ayuda nga pinansyal.
