CENTRAL VISAYAS- Nanawagan ang Department of Justice–Region 7 (DOJ-7) ug Department of Social Welfare and Development–Region 7 (DSWD-7) sa publiko nga motabang sa pagsumpo sa human trafficking ug online abuse, taliwala sa nagkadaghan nga mga kaso nga ilang natala sa rehiyon.
Base sa datos sa DSWD-7, sa 90 ka kaso sa trafficking in persons nga ilang natala, 50 niini ang may kalabotan sa Online Sexual Abuse or Exploitation of Children (OSAEC).
Samtang, gikan sa Enero hangtod Hulyo karong tuiga, naka-record na usab ang ahensya og 36 ka bag-ong kaso.
Ang mas nakapaguol, matud sa DSWD-7, 60 porsiyento sa mga suspek o perpetrators mga miyembro mismo sa pamilya sa mga biktima.
Dugang pa sa ahensya, kaniadto kasagaran nga mga batang babaye ang nahimong biktima sa maong mga krimen, apan sa kasamtangan nagkadaghan na usab ang mga batang lalaki nga nabiktima sa OSAEC ug uban pang porma sa online exploitation.
Gibutyag ni Clavel Saycon, Officer-in-Charge sa Protective Services Division sa DSWD-7, nga adunay hotline nga gitagana sa ahensya aron masayon ug mapaspasan ang pagreport sa susamang mga insidente ug aron dayon kining maaksyonan sa mga otoridad.
Giila usab sa DOJ-7 ug DSWD-7 ang dakong papel sa mga miyembro sa media ug sa mga magsisibya sa pagtabang sa pagpahibalo ug pagreport sa mga kaso sa human trafficking ug online abuse, nga nakatampo sa pagluwas sa mga biktima ug pagdakop sa mga responsable.
