CENTRAL VISAYAS- Puno sa hilak ug kalipay ang usa ka anak sa mananagat sa Isla sa Bantayan human makab-ot ang kalampusan nga kaniadto damgo ra, nahimong labing nag-inusarang Sugboanon nga naka-ranggo sa ika-6 nga pwesto sa bag-o lang gipagawas nga resulta sa 2025 Bar Examinations.
Ang alumna sa University of San Jose–Recoletos School of Law, si Atty. Jeowy Loyloy Ompad, mapasalamaton kaayo sa dakong panalangin nga iyang nadawat.
Miangkon siya nga wala gyud siya magdahom nga malakip sa mga topnotchers, ilabi na tungod sa daghang hagit nga iyang giatubang sa iyang panaw sa pagkat-on.
Matod ni Ompad, dili niya makab-ot ang maong kalampusan kung wala ang walay hunong nga suporta sa iyang pamilya, mga higala, ug magtutudlo nga mituo kaniya bisan sa pinakalisod nga mga higayon sa iyang kinabuhi.
Sa pakighinabi sa Bombo Radyo Cebu News Team, gihandom ni Ompad ang mga pagsulay nga iyang naagian, ilabi na sa panahon sa pandemya sa dihang bag-o pa lamang siyang misulod sa law school.
Tungod sa kahimtangan, napugos silang magklase pinaagi sa online—usa ka kahimtangan nga puno sa kakapoy, kakulba, ug kakulangan, apan wala kini makapahunong sa iyang damgo nga mahimong abogado.
Gibutyag usab ni Ompad nga ang pagkuha sa Bar Examinations usa sa pinakalisod nga hagit sa iyang kinabuhi. Matod pa niya, dako kaayo ang iyang pagsalig sa pag-ampo, ilabi na sa unang 30 minutos sa eksaminasyon diin nag-rosaryo siya aron mapahimutang ang iyang hunahuna ug mapalig-on ang iyang kasingkasing atol sa dakong pagsulay.
Mas nahimong mabug-at pa ang iyang panaw tungod kay samtang nagtuon sa law school, gibuhi usab ni Ompad ang iyang pamilya.
Alang kang Ompad, ang iyang kalampusan dili lamang personal nga kadaugan, kondili usa usab ka pahimangno sa paglaom.
Gidugang niini, nga nagtuo siya nga ang mga bag-ong abogado sama kaniya mahimong instrumento sa kausaban ug makatabang sa pagpaningkamot nga makab-ot ang tinuod ug patas nga hustisya sa nasud.
