CEBU CITY-Gipasabot ni Atty. Clarence Paul Oaminal ang kala-inan sa annulment og divorce.Kini subay sa gihimong pagdugong sa divorce bill sa senado.
Matud ni Oaminal sa dihang nahinabi sa Zona Libre Program nga sa Pilipinas, adunay family code nga gipanday ni kanhi presidente Cory Aquino kung diin nagprotektar kini og nagpalig-on sa pamilya.
Apan gitugutan niini ang annulment sa pipila lamang ka mga bug-at nga rason. Kini sama sa pagkaminyo nga wala sa saktong edad ug kapasidad. Apan kini mu-agi gihapon sa hukmanan, ug kinahanglan nga lig-on kaayo ang ‘grounds’ tungod kay sa Pilipinas gihatagan gayud og bili ang kaminyoon.
Gani, gitataw pa sa manlalaban nga bisan ug ‘physicaly abused’ na ang asawa, dili gihapon kini mahimong grounds para sa annulment inay mamahimo nga mupasaka og kaso ug legal separation lamang ang mahitabo, butang nga dili gihapon gawasnon ang duha ka habig nga makigminyo sa lain.
Samtang ang divorce ang matud pa nga kabubut-on lamang sa magti-ayon nga magbuwag hayan mamahimo dayon ug tugutan sila nga magbuwag bisan walay igong rason.
Ang annulment sa Pilipinas dason ni Oaminal, nga kung masakpan sa hukmanan nga nagsabotay ang magti-ayon para ma-process kini, dili gihapon tugutan.
Dugang pa sa abogado nga angayan mahibaw-an sa publiko nga sa dili pa magminyo, huna-hunaon gayud kini sa makadaghan kay kung musulod na wala na’y paagi nga makagawas pa.
