Padayun nga gipahugtan sa buhatan sa Cebu City Anti-Mendicancy Office, ang istrikto nga pagpanakop og pagpamadlong sa mga mendicant nga masigpatan sa kadalanan sa Dakbayan sa Sugbo.
Matud ni John Ryan Lumayag, ang Executive Director sa Cebu City Anti-Mendicancy Office, nga mas gipahugtan nila ang pagpatuman sa mao nga City Ordinance, subay sa padayong pagpamalik sa mga makililimosay sa kadalanan.
Sigon niini, nga ila kining gibuhat gumikan kay adunay mga kaso sa mga medicant nga daw nang-recruit og laing mga mendicant gumikan sa gihatag nga lugway kanaidto sa paghatag og konsiderasyon sa mga unang madakpan og buhian.
Hinungdan nga wagtangon na sa Anti Mendicancy Office ang konsiderasyon sa mga madakpan ug pasakaan og kaso ang mga Adults nga magdala og menor de edad samtang iturn-over kini sa buhatan sa Department of Social Works Services aron sa pag-atiman sa mga bata nga nalambigit o gigamit sa panglimos.
Dugang ni Lumayag, nga posibleng manubag ang mga indibidwal o ingun man mga content creators nga manghatag sa mga mendicants sa kadalanan subay sa nakalatid sa maong ordinansa.
Gipasabot usab niini nga sa bahin usab sa pagrescue sa mga indibidwal nga adunay problema sa pangisip, kinahanglan gayud nga iturn-over sa mga buhatan o pribadong sektor nga adunay saktong paagi sa pag-atiman niini aron paglikay sa mga kadaot o posibleng risgo sa siguridad sa publiko.
Giangkon usab sa opisyal nga wala gayu’y igong pasilidad ang kagamhanan sa dakbayan, alang sa mga “mentally illed individuals” nga marescue, hinungdan nga aduna kini giumol nga ordinansa aron makabaton og kaugalingong pasilidad ug pundo ang siyudad sa susamang mga kaso nga masugatan.
