Giaprobahan na sa Senado sa ikatulo ug katapusang pagbasa ang balaodnon nga nagdili sa Philippine Offshore Gaming Operators (POGO) sa nasod.
Diin ang Senate Bill 2868 o ang Anti-POGO Bill nagdeklarar nga ilegal ang offshore gaming operations sa nasod.
Ang tanang 23 ka mga senador mibotar nga pabor sa maong balaodnon.
Matud ni Senador Sherwin Gatchalian nga ang paghimo og balaudnon nga nagpalig-on sa pagdili sa gobyerno sa tanang POGOs makatabang sa pagsiguro sa hingpit nga pagwagtang sa bisan unsa nga nahabilin nga mga bakas sa POGOs ug pagsiguro usab nga ang pagdili magpadayon bisan kung matapos na ang kasamtangang administrasyon.
Ang balaudnon nagmando usab sa pagsakmit sa tanang propyedad ug kahimanan nga may kalabotan sa POGOs aron mapugngan ang paggamit niini pag-usab sa mga ilegal nga operasyon.
Kahinumdoman nga nanawagan si Hontiveros sa Malacañang nga suportahan ang gisugyot nga balaudnon sa Senado.
Kini aron ang polisiya sa pagdili sa mga POGO sa nasud dili magdepende lang sa mando sa executive branch.
Matod niya kinahanglan nga mapasar ang klaro, kompleto ug komprehensibo nga anti POGO bill aron masiguro nga dili na mubalik ang mga POGO sa Pilipinas.
