CEBU CITY-Dakong supak ug mipadayag sa iyang kalagot si Teody Navea, ang Sanlakas-Cebu secretary general kalabot sa Anti-Terrorism Bill.
Kini human usab nga nakita niini nga usa ka pamulitika ang maong pagduso sa maong balaudnon ug nakita niini nga gitayming kini niining panahon sa pandemya.
Matud ni Navea sa dihang nahinabi sa Bombo Radyo Cebu sa tulumanong Dura Lex Sedlex,giingon niini nga panahon sa Covid-19 wala natagaan ug klarong ayuda ang katawhan ug kung ugaling mahuman na ang pandemya sigurado nga mag-alsa gyud ang katawhan gumikan sa kasagmuyo niini sa gobyerno.
Hinungdan nga alang kang Navea gituyo kining maong balaudnon nga paspasan ug mapasar dayon aron nga dili na magprotesta ang katawhan human sa pandemic sanglit sa maong balaudnon, mamahimo naman kining dakpon human nga ma “tag” na nga terorismo ang protesta kung diin itugot na ang warrantless arrest ug prolonged detention bisan og wala pay kaso.
Panawagan usab ni Navea karon nga ibasura kining maong balaudnon, ug mas angayan nga tutukan ang human rights bill.
Dugang pa niini nga dili tinood nga walay nahimo ang mga raliyesta sa ilang pagsaba-saba sa kadalanan gumikan kay sa ilang pag-alsa, ang gobyerno magmatngon usab sa ilang kahiwi-an ug wala kini mahimo inay nga aksyonan dayon ang usa ka issue.
Sanglit kung wala matud pa’y magsaba mag-unsa nalang matud pa ang mahitabo sa nasud ug maghuwat nalang ba ang katawhan nga mangamatay nalang. | fdp
