CEBU CITY- ‘Daw dili gihapon katuo sa kalampusan nga nakab-ot sa usa ka Sugboanong gradwar human kini nakapasar sa napahigayong March 2026 Physicians Licensure Exam diin sa maong resulta kay na-topnotcher pa kini.
Kini ang gibati ni Aiter Kim Fernandez Kasayan sa iyang eksklusibong pamahayag sa Bombo Radyo Cebu News Team diin iyang gipadayag ang iyang pasalamat sa kalampusang nakab-ot nga mitungtong siya sa ika-10 nga pwesto sa topnotchers’ list sa maong licensure examination.
Gani sumala pa sa iyang kasinatian, nga wala dayon siya mituo sa sulti sa iyang kapikas sa kasing-kasing nga na-topnotcher siya og karong hingpit nang nahimong doktor.
Didto na wala niya mapugngi ang luha nga midagayday sa iyang mata tungod sa grabeng kalipay nga nabati nga nahimong nang kamatuoran ang iyang kanhi lang damgo sa kinabuhi.
Gradwar sa Medical Technologist sa iyang pre-med course si Kasayan nga nahimong hanas niya isip karon nahimong pinakaunang doktor sa ilang pamilya.
Saysay pa ni Kasayan nga dili sayon ang iyang naagian diin ang iyang bugtong nga paghandom nga makapasar lang sa kursong gipaningkamotan nga miabot pa sa higayon nga adunay mga pagduda sa pagtuman sa ambisyon apan iya kining nalatayan og nalabang sa mas madaugong resulta.
Namulong pa og tambag si Kasayan ilabi na sa mga kabatan-onan nga nangandoy sab mahimong doktor nga seryosohon ang pagtuon ug kasikbit nga mga kahago niini sulod sa pipila ka katuigan aron sa katapusan dili magmahay sa pagkab-ot sa propesyon nga makatampo og kaayuhan dili lamang sa kaugalingon apan sa ubang tawo nga luwason nimo ang kinabuhi.
