CEBU CITY– Nag-atubang karon og kasong illegal possesion of fire arms ug kalapasan sa Batasang Pambansa Bilang 6 ang upat ka mga nagpailang mga ‘Datu’ sa usa ka tribu.
Kin human masikop ang miyembro sa giingong ‘Tribu Alima-ong’ nga sila si Kali Sirol, 31 anyos, Datu Ilra Kidlat, 40 anyos Kali Pantir, 49 anyos ug Datu Apo Rajah Caballes, 48 anyos tungod kay nangikil sa mga vendors sa Cebu, Carbon Public Market sa rason nga ila ang yuta nga gitukuran sa naasoy nga merkado.
Una niini,na-alarma ang mga vendors sa pag-abot sa 4 ka tao nga nagsul-ob og real tree pattern camouflage ,dunay mga ‘tribal accessories’,taas ang bungot, bitbit ang armas ug duna pay espada.
Nanukot matud pa kini sa bayad tungod kay ila ang maong luna.
Dali hinoon nga miresponde ang mga pulis ug nasikop dayon ang upat.
Sa dihang mahinabi sa Bombo Radyo Cebu si Datu Apo Rajah, ang nagpa-ilang ‘general’ sa ilang tribu nga duna matud pa siyay mga dokumento nga magpamatuod nga iya ang 634,000 sq meters nga luna.
Iligal usab matud pa ang pagsikop sa mga pulis kanila tungod kay usa ka violation kun kalapasan sa ilang tribu ang pagdakop matud pa sa usa ka ‘datu general’.
Matud pa usab niini nga kanhi gipanag-iya ang maong yuta sa iyang apohan nga si Rajah Jumabon hangtud nga napasa na ngadto kaniya. (Report ni Bombo Jun Salde)
