CEBU CITY-Nakuhaan og iligal nga armas ang nag-viral nga lalaki nga si Arbie Cuervo kinsang manapak og tiil kung gani dili kini hatagan og kwarta sa iyang mga masakyan nga jeep diin nasikop kini sa Criminal Intelligence Unit-Cebu City Police Office.
Depensa ni Cuervo nga tungod sa daling pagkatap sa iyang hulagway sa social media dili na usab katingad-an nga posibleng mameligro ang iyang kinabuhi.
Gani, dugang niini nga ang maong armas nga iyang gidala-dala pang-depensa lang sa iyang kaugalingon.
Samtang, sa pakighinabi sa Bombo Radyo Cebu News Team kang Hon. Dave Tumulak kinsang unang nisaksi sa pagpangayo og pasaylo ni Cuervo ngadto sa iyang mga nabiktima ug misaad nga dili na mausab sa miaging adlaw apan, mao na kini ang misugat sa kapitan.
Matud sa Kapitan nga mas labing maayo nga nahipos na kini arun dili na makahatag og kahadlok ug kalisang sa ubang mga pasahero.
Ug dako ang pasalamat ni Tumulak sa mga kapulisan nga nakadakop kag Cuervo.
Subay niini, gi-awhag sa opisyal ang publiko nga kung gani adunay susama nga panghitabo, ipadangat kini sa mga otoridad arun mahatagan kini og saktong aksyon.
Arun masiguro ang kaluwasan sa mga katawhan gani, dili lang mga sakop sa kapulisan ang gi-awhag ni Tumulak gumikan lakip usab niini ang mga Barangay Tanod sa tagsa-tagsa ka mga lugar arun mamintar ang kalinaw ug kahapsay sa dakbayan.
