Nanawagan si Cebu Archbishop Alberto S. Uy sa mga Katoliko sa Archdioceses sa Cebu nga moapil sa White Ribbon Movement March nga gipasiugdahan sa nagkalainlaing grupo sa relihiyon ug gisuportahan sa Catholic Bishops’ Conference of the Philippines (CBCP).
Gidasig ni Archbishop Uy ang mga magtutuo nga magsul-ob og puti nga sinina atol sa Misa sa Hunyo 28, 2026, o magbutang og puting laso isip simbolo sa ilang suporta alang sa kamatuoran, pananagutan, hustisya, ug maayong panggobyerno.
Iyang giimbitar usab ang mga pamilya, eskwelahan, opisina, negosyo, ug mga institusyon nga magpakita og puting laso sa ilang mga balay, sakyanan, lugar sa trabaho, ug mga simbahan isip timailhan sa panawagan batok sa korapsyon ug pagkadili matinud-anon.
Matud ni Uy, ang puting laso nagsimbolo sa paglaum alang sa nasud nga gawasnon gikan sa korapsyon ug nagpahinumdom nga ang tinuod nga kausaban magsugod sa kaugalingong kasingkasing.
Gidugang sa arsobispo nga dili lamang kutob sa Hunyo 28 ang maong panawagan, kundili ipadayon ang pagpangita sa kamatuoran, pagsalikway sa sayop nga impormasyon, pagsupak sa korapsyon, ug pagpanubag sa kaugalingon ug mga lider sa katilingban.
