Gipagawas sa Archdiocese of Cebu ang ilahang mensahe sa pag-ampo o prayer message samtang nagtak-op ang tuig 2025 ug nagsugat ang mga magtutuo sa Bag-ong Tuig 2026.
Sa ilang pahimangno, gidasig ang tanang magtutuo nga balikan uban sa pagpasalamat ang milabay nga tuig, ang mga panalangin, leksyon, ug mga tawo nga gigamit sa Diyos sa matag yugto sa kinabuhi.
Matod pa sa archdioceses, ang tanang kalipay ug pagsulay mga gasa sa Ginoo nga naghulma ug nagpalig-on sa atong pagtuo.
Samtang mosulod ang 2026, gihangyo sa Archdioceses of Cebu, ang katawhan nga ipahimutang ang bug-os nga pagsalig sa Diyos, sa Iyang giya, gugma, ug sa pagdumala sa Espiritu Santo—aron magkinabuhi nga adunay kaisog, pagkamanggihatagon, ug paglaum, bisan pa sa mga hagit nga umaabot.
Gitapos sa archdioceses ang ilang mensahe pinaagi sa usa ka pag-ampo alang sa malinawon, maligdong, ug mapuslanong Bag-ong Tuig alang sa tanang Sugboanon ug sa tibuok katawhan.
