CEBU CITY- Gipangulohan ni Mayor Nestor Archival ug Bise Mayor Tomas Osmeña, kauban ang mga opisyal sa Department of Transportation (DOTr), ang ikatulong adlaw sa inspeksyon sa ruta para sa Cebu Bus Rapid Transit (CBRT) karong adlawa, Biyernes, Septiyembre 19, 2025.
Gisulayan ug gi-inspeksyon ang dalan gikan sa Fuente Osmeña padulong sa South Bus Terminal, usa ka hinungdanon nga lakang aron masiguro nga andam na ang CBRT system sa wala pa ang opisyal nga dry run.
Gipahibalo ni Mayor Archival nga ang karong adlaw nga aktibidad usa lamang ka hugot nga pagtan-aw sa rota ug dili pa kini ang aktwal nga dry run.
Gikatakda ang opisyal nga dry run sa Septiyembre 29, diin apil ang Phase 1 sa proyekto gikan sa SM Seaside City sa South Road Properties (SRP) paingon sa Ayala Center Cebu ug balik.
Gibutyag ni Archival nga ang Phase 1 mao ang gisang-at nga pasiunang koridor sa unang mass transit system sa lungsod, usa ka dakong milestone alang sa transportasyon sa Cebu.
Bisan pa man sa kalamboan, miangkon kini nga wala pa siya hingpit nga makuntento sa kahimtang sa proyekto tungod sa traffic congestion nga nasinatian sa kilid nga dalan atol sa inspection karon.
Ang maong isyu nagpangayo pa og dugang mga pag-ayo aron masiguro ang hapsay nga paglihok sa CBRT sa umaabot.
