Nasayran sa mga imbestigador nga ang armas nga nalambigit sa nahitabong pagpamusil sa usa ka tunghaan sa Tacloban, adunay parehas nga serial number sa usa ka armas nga narehistro sa usa ka security agency nga nakabase sa Sugbo.
Sa gihimong press conference karong Miyerkules, giklaro ni Police Colonel Elmer Cinco, ang hepe sa Regional Civil Security Unit 7 (RCSU-7), nga magkalahi ang maong mga armas apan managsama ra ang nakatatak nga serial number niini.
Gikompirmar usab ni Cinco ang posibilidad nga gi-kopya o duplicate ang Cal. 38 ARMSCOR Revolver nga gigamit sa sa mga suspetsado sa nahitabong Tacloban School Shooting niadtong milabay nga Lunes.
Kini ang iyang gikabutyag human sa ilang gihimong inisyal nga imbestigasyon nasayran nga kasamtangan nga nakadeploy sa usa ka bangko sa Probinsiya sa Bohol ang armas nga adunay serial number na nakarehistro sa usa ka Security Agency dinhi sa Dakbayan sa Sugbo.
Niining tungura, padayon nga nakig-alayon ang RPCSU-7 sa PRO-8 alang sa paghatag ug dugang kasayuran, ug gipaubos na karon sa forensic examination ang maong armas nga anaa sa Bohol, samtang ang mga awtoridad sa Regional Civil Security Unit sa Eastern Visayas (RCSU-8) nagsugod na usab sa ilang pakisusi kalabot sa maong pagkadoble sa serial number.
