Mipadayag sa iyang dakong kabalaka si Cebu Board Member Malcolm Sanchez ang iyang bahin sa nagapadayong hulga sa seguridad ug mga insidente sa kapintasan sa armas sa mga tunghaan.
Matud pa niya, ang mga tunghaan kinahanglan magpabilin nga mga lugar sa pagkat-on ug dili kahadlokan, aron masiguro ang kaluwasan sa mga estudyante kansang mga ginikanan nagdahom nga sila makapauli nga luwas matag adlaw.
Gihisgutan ni BM Sanchez sa mga nangaging insidente sa nasud, lakip na ang pagpamusil sa San Jose National School sa Tacloban City niadtong Hunyo 22, 2026, diin duha ka estudyante nga nag-edad og 14 ug 15 ang misulod ug namusil, nga miresulta sa kamatayon sa tulo ka estudyante ug pagkaangol sa uban.
Dugang niya nga bisan ang probinsya sa Cebu dili luwas niining mga nitumaw nga hulga. Subay na usab sa pipila ka adlaw ang milabay, usa ka 14 anyos nga estudyante sa Lut-od National High School sa Pinamungahan, Cebu ang nakit-an nga adunay .357 revolver sa iyang bag atol sa usa ka surprise inspection.
Gawas sa mga nakuhang armas, nahisgutan usab niya ang nagpadayon usab ang mga pagpanghadlok sa social media batok sa pampublikong ug pribadong tunghaan, lakip na ang sa Cebu Eastern College, mga eskwelahan sa Consolacion ug Talisay, Inayawan National High School diin nasuta nga usa ka 13-anyos nga kanhi estudyante ang naghimo sa online threat, ug ang kontrobersyal nga hulga batok sa Sacred Heart School – Ateneo de Cebu nga nakapatukaw sa kabalaka sa mga ginikanan.
Aron matubag ang maong seryosong hulga sa seguridad, si Board Member Sanchez nagsang-at og resolusyon sa Sangguniang Panlalawigan nga nagdapit sa mga opisyal gikan sa mga ahensya sa edukasyon, pagpatuman sa balaod, disaster management, imbestigasyon, ug security agencies sa pagpahigayon og miting ug pagrepaso sa kasamtangang mga sumbanan aron mapalig-on ang seguridad ug proteksyon sa tanang eskwelahan sa probinsya.
