CEBU – Taliwa sa sunodsunod nga pagka-intercept sa tulo ka managlahing operasyon sa otoridad kalabot na sa pagpanghoard og asukar , gikuhaan og habig sa Bombo Radyo Cebu ang usa sa mga board of director sa Cebu Planters Association.
Sa pakighinabi , gibutyag ni Medellin Vice Mayor Juan Alfonso Lim nga dako ang ilahang pasalamat kang President Ferdinand “Bongbong” Marcos Jr. tungod sa kamandoan niini nga inpeksyonon ang nagkadaiyang bodega sa asukar sa nasod.
Matod pa ni Lim angay lang kini nga buhaton aron mapamatud-an nga gimanipula sa mga traders ang kakuwang sa asukar gumikan sa ilaha ipahid ang basol og nganong kuwang ang supply sa asukar tungod sa ubos nga production niini.
Tataw pa sa opisyal nga ang mga gihimong pagpangronda sa mga bodega sa asukar ug ang mga nakit-an nga sinakong gi-hoard usa ka pagpamatuod nganong nakuwang ang supply sa asukar.
Nidugang usab kini nga klarong tataw nga adunay kalambigitan ang mga opisyales sa Department of Agirculture (DA) ug Sugar Regulatory Administration ( SRA) sa maong mga ilegal nga binuhatan.
