Gibutyag ni Senador Ronald “Bato” dela Rosa nga ang mga artistang Senador maoy giingong nagpasiugda sa pagpalagpot ni Senador Juan Miguel Zubiri isip Senate President.
Mao kini ang gipadayag taliwa sa mga huhungihong nga ang iyang imbestigasyon sa mga leak sa PDEA giingong nisangpot sa pagpalagpot ni Zubiri isip presidente sa taas nga balay sa kongreso.
Dugang pa, nga bisan sa wala pa ang imbestigasyon sa giingong PDEA leak, aduna nay lakang nga pagpalagpot batok kang Zubiri nga giingong naglakip ni Senador Jinggoy Estrada, butang ngana-solusyonan ra.
Gitataw ni Bato, nga nabanhaw ang lakang sa pagpalagpot batok kang Zubiri human giingong nagdumili kini sa pagtugot kang Sen. Ramon “Bong” Revilla nga motambong sa mga session “online” tungod sa samad sa iyang tiil, butang nga nakapasuko sa ubang mga artista nga senador sama ni Sen. Robin Padilla, ug Sen. Jinggoy Estrada.
Sa laing bahin, ang nahisgutang mga senador wala pa motubag niining mga pamahayag ni Sen. Del Rosa.
