Giklaro ni Senador Robinhood “Robin” Padilla niadtong Huwebes ang iyang kontrobersyal nga pamahayag diin iyang gitawag ang iyang kaugalingon nga usa ka “komunista”.
Ang maong pagpatin-aw gihimo sa senador sunod sa mga pagsaway sa publiko human sa hearing sa impeachment trial ni Bise Presidente Sara Duterte.
Pinaagi sa usa ka post sa Facebook, gipasabot ni Padilla nga ang iyang pulong nga “komunista” walay kalabotan o koneksyon sa armadong komunismo.
Giklaro sa senador nga wala na siya nagatoo niining matang sa armadong pakigbisog tungod kay daghan na kini og nakalas nga kinabuhi ug nabiktima sulod sa kapin sa lima ka dekada.
Hinunoa, giklaro ni Padilla nga ang iyang gipasabot mao ang gitawag nga Christian communism (Kristiyanong komunismo) ug ang sistemang Mu’akhat sa tinuohang Islam—mga karaang sistema sa pagpaambit, pagtinabangay, ug kooperasyon sa unang mga Kristiyano ug Muslim.
Kahinumduman nga giluwatan sa senador ang maong katin-awan human sa kusganong reaksyon sa aktres nga si Angel Locsin.
Gikuwestiyon sa aktres kung nganong nagpakahilom lang si Padilla sa dihang balik-balik siya nga gi-red-tag kaniadto, bisan pa man kung nasayod ang senador nga bakak ang maong mga pasangil batok kaniya.
Gipaambit usab ni Locsin ang iyang mga nahinumduman nga istorya nga giingong gisulti ni Padilla kaniya kaniadto bahin sa mga kasinatian sa senador sa pag-apil sa armadong kalihukan.
