MANDAUE CITY-Gidakop ang usa ka lalaki human giingung nitigbas sa makadaghan sa iyang asawa sa Barangay Basak, siyudad sa Mandaue alas 5 sa hapon niadtong Lunes, July 17.
Hinuon luwas ra ang asawa bisan pa sa walo ka mga tigbas sa nagkalain-lain niya nga parte sa lawas.
Nasikop sa kapulisan si Julius Besabella, taga sitio Alliance of two Hearts sa Barangay Basak sa Mandaue.
Giila ang asawa sa kapulisan nga si Mary Joy Magale Besabella, 31 anyos, ang kasamtangan nagpaayo sa iyang mga samad sa usa ka hospital sa Mandaue.
Matud ni Police Lieutenant Colonel Franco Rudolf Oriol, ang deputy city director for operations sa Mandaue City Police Office nga nagbuwag ang mag-asawa duha na ka tuig human giingung napamabdusan ang asawa sa laing lalaki.
Sukad ato, wala na kuno nagka-ayo pa sila apan ang asawa giingun magsamok-samok sa iyang bana sa iyang social media account ug magbilin og mga negatibong komento, mao kato ang hinungdan nga gikompronta ang asawa sa iyang panimay ug gitigbas sa makadaghan.
