Nanawagan ang asawa sa giilang suspetsado sa pagpusil-patay kang Police Captain Joel Deiparine sa CIDG Regional Field Unit 7, nga si Leonardo “Jun” Manto Jr., sa kapulisan sa kaulohan nga ipatuman ang patas ug makiangayon nga imbestigasyon kalabot sa maong kaso.
Gipasabot sa asawa nga sukad sa insidente niadtong Oktubre 25, 2025, wala pa sila magkita ni makastorya sa iyang bana.
Tungod niini, mibisita siya sa Cebu City Police Office (CCPO) aron makita ug masayran ang kahimtang ni Manto, ilabi na nga nabahin siya sa kabalaka ug kahadlok sa kalisod nga gipang-atubang sa ilang pamilya.
Matod pa niya, lisud tuuhon nga ang iyang bana makabuhat og ingon nga krimen, kay usa kini ka maayo nga bana ug maayong amahan.
Gidugang pa niya nga dili manghilabot si Manto kung dili siya unhan, ug wala usab kini’y personal nga away batok sa kapulisan.
Kung kahinumduman, nga boluntaryong misurrender si Manto sa kapulisan sa Pasig City niadtong Miyerkules sa gabii, Oktubre 29, 2025, tungod sa kabalaka sa iyang seguridad, sanglit kabaro sa kapulisan ang biktima.
Samtang, giingon ni Cebu City Councilor Dave Tumulak nga dili angay nga isipin nga isolated case ang pagpusil-patay kang Captain Deiparine.
Matod sa konsehal, kinahanglan nga lalumon ug palagman pag-ayo ang imbestigasyon aron masuta ang tinuod nga motibo ug kung adunay mas lawom nga koneksyon sa likod sa maong krimen.
Sa pagkakaron, padayon ang malalum nga imbestigasyon sa kapulisan aron mahibal-an ang tinuod nga hinungdan ug ang posibleng kasangkot sa pagpatay sa opisyal sa CIDG.
