Nagpabiling hulga sa industriya sa baboy sa lalawigan sa Bohol ang African Swine Fever (ASF), diin adunay labing menos pito ka mga hot spot area nga nailhan na.
Ang Bohol Provincial Government nagkanayon nga 6,043 ka baboy gikan sa 1,636 ka backyard raisers ang na-depopulate gikan sa buwan Nobyembre 2024 hangtod Hunyo 2025 isip containment measure nga gipatuman sa mga hotspot areas sama sa Catigbian, Candijay, Valencia, Mabini, Maribojoc, Alicia, ug Ubay.
Busa, ang kagamhanang probinsyal sa Bohol niluwat og advisory kabahin sa maong hulga nga ang ASF nagpadayon sa paghatag og seryoso nga mga risgo sa nahisgutang lalawigan.
Samtang, ang Provincial Veterinarian (OPV) usab nakipagtambayayong sa Municipal Agriculture Office sa mga apektadong lokalidad aron ma-edukar ang mga residente bahin sa mga hulga sa ASF.
Ang labing bag-o nga kampanya sa adbokasiya sa ASF gipahigayon niadtong Agosto 20 sa Mayor Pablo O. Lim Memorial Astrodome sa lungsod sa Valencia, ug gisalmotan kini sa mga barangay officials ug grassroots volunteers, barangay livestock aides (BALA), barangay health workers (BHW), ug mga tanod gikan sa 35 ka barangay sa Valencia.
Atol sa panagtapok, giawhag sa OPV ang mga hog raisers ug mga residente nga i-report dayon ang bisan unsang gidudahang kaso sa ASF alang sa husto nga test ug blood samples nga nagpasiugda aron mapugngan ang outbreak.
Nunot niini, niluwat na og gipahibalo si Gobernador Aris Aumentado nga iyang himoong prayoridad ang agrikultura sa iyang ikaduhang termino sa katungdanan kay makapausbaw kini sa seguridad sa pagkaon ug manalipod sa panginabuhi sa mga mag-uuma.
