CEBU CITY – Gipasalig ni Cebu City Councilor Dave Tumulak nga tabangan ang pamilya nga namatyan human sa sunog nga mitumaw sa Barangay Sta. Cruz, Cebu City.
Pinaagi kini sa burial assistance ug calamity assistance nga ihatag sa Cebu City government ngadto sa mga nasunogan ug pamilya sa namatyan nga biktima sa sunog.
Matud ni Tumulak nga nagpaabot pa kini sa tubag ni Cebu City Mayor Edgardo Labella sa iyahang hangyo nga hatagan sa hinanali nga tabang ang mga nabiktima sa sunog.
Nasayran nga pito katawo ang namatay ug napa-ig nga buhi sa sunog sa Barangay Sta. Cruz niadtung nakalabay nga adlaw gumikan kay wala kini makagawas sa ilahang panimalay.
Gawas niini, aduna usab ihatag nga financial assistance gikan sa Barangay, kini ang gibutyag ni Brgy. Sta. Cruz Captain Jerome Lim.
Matud pa niini nga 30 ka mga indibidwal ang apektado sa insidente diin kadaghanan niini kay mga renters ug boarders nga wala nakuha sa ilang mga gamit.
Dugang pa niini nga ilahi na kining gipahimutang samtang nihatag na usab og hinabang ang City Social Welfare and Development.
Samtang, gisaysay ni Lim nga wala nakagawas kay na-trap sa sulod ang mga nangamatay human nga naka-lock ang pultahan.
Sa ilang imbestigasyon, unang nagsugod ang sunog sa 1st floor samtang ang mga biktima kay anaa sa 2nd floor.
MAHIMONG MAGBINANTAYUN KANUNAY
Pahimagno pa sa chairperson for the committee on disaster risk reduction and management sa mga sugboanun nga mahimong magbinantayun ilabi na sa mga butang o sitwasyon nga posibling mosamput sa sunog o uban pang insidente.
Hangyo pa ni Tumulak nga siguroon sa mga ginikanan ug tagtungod nga adunay safety plans ang ilang panimalay ilabi na ang mga exit ug entry point sa panahon sa insidente.
I-check ug i-mintinar ang mga appliances ug linya sa kuryente kanunay arun dili mosamput sa aksidente.// EKP
