Nipahigayon ang Department of Justice sa ilang ikaduhang preliminary investigation sa na-missing nga kaso sa mga sabungero gahapong adlawa, Setyembre 29, 2025.
Gitambungan kini sa daghang mga kabanay sa mga nawala nga sabungero, mga abogado sa duha ka habig, ug mga representante sa Philippine National Police – Criminal Investigation and Detection Group.
Atol sa hearing sa panel of prosecutors, ang PNP-CIDG nisumiter og lima (5) ka kopya sa USB nga may kalabutan sa nawala nga kaso sa mga sabungero.
Matod ni Senior Assistant State Prosecutor Charlie Guhit, kini human gimando sa prosekusyon nga ipresentar kini sa hangyo sa respondent nga si Charlie ‘Atong’ Ang.
Bisan kung gitugotan kini sa panel sa mga prosecutor, si Guhit sa sinugdanan palang nagdumili na nga ibutyag o ipahibalo sa publiko ang sulud sa USB.
Sa laing bahin, pormal nga gi-obligar sa prosekusyon ang mga respondents, apil na si Charlie ‘Atong’ Ang, nga moatubang sa sunod nga preliminary investigation.
Gimanduan usab sila sa panel of prosecutors sa pagsumite sa ilang mga counter affidavit isip mga respondents sa nawala nga kaso sa mga sabungero.
Ang negosyante nga si Atong Ang ug uban pa nag-atubang og kasong multiple murder, ug serious illegal detention kalabot sa pagkahanaw sa mga sabungero.
Sa laing bahin, ang sunod nga schedule sa Preliminary Investigation gikatakda sa Nobyembre 3 human makanselar ang unang schedule sa Oktubre 13.
