Gikompirmar sa Department of Justice (DOJ) nga gipasakaan na og multiple counts of murder ug serious illegal detention ang negosyante nga si Atong Ang ug iyang mga kauban tungod sa ilang pagkalambigit sa pagkawala sa mga sabungero.
Matud ni DOJ Secretary Crispin Remulla nga ang mga kabanay sa mga biktima sa mga nawala nga sabungero mismo ang nipasaka sa kasong multiple murder ug serious illegal detention.
Gipasakaan usab og kaso ang aktres nga si Gretchen Barretto ug uban pa.
Dugang pa sa kalihim nga tataw nga adunay mga yawe nga saksi nga nagpamatuod nga nalambigit si Ang.
Ingon man nga gidayeg ni Remulla ang whistleblower nga si Julie “Dondon” Patidongan sa iyang kaisog sa pagbutyag sa mga nagpaluyo sa mga missing sabungero.
Giisip ni Remulla nga “main player” si Ang sa kaso, ilabi na nga siya ang amo ni Patidongan.
Masaligon si Remulla nga adunay patas nga pagdungog sa kaso aron masulbad sa hustong paagi ang kaso.
