CEBU – Gibutyag ni Police Colonel Engelbert Soriano, ang direktor sa Cebu Police Provincial Office (CPPO), nga dako ang posibilidad nga dili tinuod ang giingong attempted kidnapping incident sa lungsod sa Alegria sa habagatang kasadpan sa Sugbo nga nag-viral online.
Kini base na usab sa resulta sa inisyal nga imbestigasyon sa kapulisan.
Matod ni Soriano nga ila nang giila ang rehistradong tag-iya sa van ug nakig-alayon na ang mga imbestigador sa naasoyng drayber.
Sa pamahayag sa drayber, giingong nagmaneho kini og tourist van gikan sa Badian paingon sa dakbayan sa Sugbo apan niadtong tungora wala siyay mga pasahero.
Giangkon sa driver nga samtang nagbyahe kini sa national highway sa Alegria, namik-up kinig pasahero paingon sa dakbayan sa Sugbo aron makabawi sa iyang gasto sa krudo.
Ug didto iyahang naagian ang usa ka estudyante nga iya usab nga gihonongan ug giagni nga mosakay kung magpa Cebu City ba kini.
Nagtuo si Soriano nga nahadlok ang maong bata nga maoy hinungdan nga mitug-an kini sa iyang mga kabanay nga gisuwayan kini pagdagit.
