CEBU CITY-Nakuha ni Atty. Edgar Labella ang mayoralty seat sa Cebu City human mi concede si Mayor Tomas Osmeña.
Sa pakighinabi sa Bombo Radyo Cebu kang newly elected Mayor Labella,gidayeg niini si Osmeña sa gihimong pagconcede.
Nagpasalamat si Labella sa mga Sugbuanon sa higayong gihatag kaniya nga mangulo sa dakbayan sa Sugbo. Gi-acknowledge usab ni Labella si Presidente Rodrigo Duterte tungod kay dako matud pa kini og natabang para sa iyang kadaugan.
Subli usab nga gitino ni Labella nga bisan kanus-a wala niya gigamit ang mga pulis para sa iyang kandidatura.
Hangyo karon sa bagong mayor sa mga Sugbu-anon nga magtinabangay ug kalimtan na ang panagbangi ug ingon man ang pagdumot.
Gisiguro usab niini nga tanang mga transaksyon unya matud pa sa city government ang muagi gyud sa publiko ug sa saktong proseso ug dili tungod lang sa kung kinsa ang kaalyado niini sa pulitika.
Nag-ampo usab si Labella nga tagaan siya og maayong panglawas, abli nga panghuna-huna ug kasing-kasing para matuman og tarong ang iyang tahas isip lider sa Sugbo.
Mensahe usab niini sa publiko nga magtinabangay para sa ikaayo sa tanan.
