Nibutyag si kanhi presidential spokesman Atty Harry Roque nga dunay organisasyon nga nitabang niya sa iyang asylum application sa Netherlands.
Sa video message, si Roque niingon nga nakigtagbo siya sa nasangpit nga organisasyon uban sa iyang abogado aron mahan-ay ang mga ebidensya nga iyang gihuptan nga magamit sa iyang aplikasyon.
Matod niya apil na niini ang mga ebidensya nga nahipos gikan dinhi sa Pilipinas.
Gitumbok ni Roque nga ang pagpasaka og non-bailable case batok kaniya maoy labing lig-ong ebidensiya nga magamit pagmatuod nga nag-atubang siya og political persecution.
Gitawag sab ni Roque ang iyang kaugalingon nga ‘most popular’ asylum applicant, mao nga matod niya importante nga andam siya kanunay sa iyang aplikasyon.
Subling gipasabot sa beteranong abogado nga dili niya mapasaylo ang pamilyang Marcos nga nagpugos niya sa pag-aplay og asylum sa Netherlands taliwala sa political persecution nga iyang giatubang.
Ang Angeles City Regional Trial Court Branch 118 kay una nang niisyu og warrant of arrest batok kang Roque, Filipino-Chinese businesswoman nga si Cassandra Ong, ug ubang mga indibidwal tungod sa giingong kalambigitan nila sa illegal nga operasyon sa Philippine Offshore Gaming Operator (POGO) sa Pampanga.
Ang kanhi presidential spokesperson kusganong nagmintinar sa iyang pagka-inosente sa maong kaso.
