CEBU CUITY- Gihimakak ni Atty. Mikel Rama, ang anak ni Dismissed Cebu City Mayor Michael Rama, ang mga alegasyon nga ang iyang Law Office midawat sa P100-milyones nga para unta sa Cebu City Medical Center (CCMC) gikan sa donasyon sa usa ka pribadong indibidwal o institution nga nagpabiling wala hinganli.
Giklaro sa batan-ong Rama nga ang Law Office diin siya usa ka Senior Partner sa Rama Baena Tan Ang (RBTA) Law Office midawat og bahin sa kinatibuk-ang P205-milyones nga donasyon para sa pagtapos sa 8th, 9th ug 10th floor.
Nas-kwestiyon sab sa maong transaksyon kung ngano mi bypass kini sa Cebu City Treasurer’s Office (CTO).
Dugang sa batan-ong Rama nga ang maong nahisgotang pundo kay nagpabiling pribado aron daw malikayan ang mga potential interference o pagpanghilabot uban sa Cebu Medical Society (CMS) isip designate nga trustee.
Sa laing bahin, si Atty. Joselito Baena, kauban nga abogado sa RBTA Law Office diin gipamahayag niini nga ang nahimong Trust Agreement nga nagtudlo sa ilang buhatan isip Attorney-in-Fact sa maong undisclosed donor kay aron mapabilin ang transparency ug security sa kwarta.
Miulbo ang maong isyu human adunay tawag sa pagpang-imbestigar sa Sangguniang Panglungsod sa kagamhanang dakbayan sa Sugbo (Cebu City Council), Commission on Audit (COA), ug Office of the Ombudsman.
