MANDAUE CITY-Gihagit ni Mandaue City Treasurer Atty Regal Oliva si Mandaue City Lone District Congresswoman Emmarie “Lolypop” Ouano-Dizon sa umaabot Midterm Elections sa Mayo 2025.
Kini human si Oliva nipasangil kang Ouano-Dizon ug sa iyang pamilya nga maoy nihangyo nga ibalhin siya sa Navotas City nga giingong gikompirmar sa iyang kasaligang tinubdan gikan sa Department of Interior and Local Government ug usa ka kawani sa Office of the House Speaker.
Matod pa ni Oliva nga suklan niya si Ouano-Dizon kung unsa man nga pwesto sa gobyerno ang lansaran niini.
Gihugon-hugon sa pipila ka mga lungsuranon sa dakbayan sa Mandaue nga si Ouano-Dizon o ang iyang manghod nga si Cebu 6th District Provincial Board Member Jonkie Ouano maoy modagan pagka mayor batok ni incumbent Mandaue City Mayor Jonas Cortes.
