AUSTRIA — Nakabuhi ang usa ka babaye nga triathlete human niya gidayeg ang mga orkidyas sa nagkidnap kaniya.
Base sa imbestigasyon sa kapulisan, giingong nabangaan og kotse ang professional triathlete nga si Nathalie Birli, 27-anyos, hinungdan nga nabali ang iyang braso sa Graz, Austria.
Gihapak sa driver sa sakyanan si Birli gamit ang usa ka kahoy ug gidala kini sa balay sa gituohang kidnapper.
Matud ni Birli nga sa dihang nakamata kini, hubo ang iyang lawas ug gihiktan siya sa usa ka armchair sulod sa usa ka karaang balay.
Gisaysay sa triathlete nga gipugos siya sa pag-inom og bino sa wala pa kini gi-suffocate ug lumsan sa usa ka bathtub nga adunay bugnaw nga tubig.
Apan gi-atik hinuon ni Birli ang nagkidnap kaniya human niya gidayeg ang daghang mga orkidyas nga anaa sa palibot.
Bisan pa man og wala sa maayong mood ang kidnapper, nahimong maayo ang pagtagad niini ngadto sa triathlete.
Nasayran nga hilig diay sa kidnapper ang gardening kon pagpagwapa sa hardin sukad sa iyang pagkabata.
Wala madugay, nakabuhi si Birli human niya gi-atik ang kidnapper.
Gihatod pa gyud ni kidnapper ang triathlete sakay sa bike nga adunay GPS system ug sa dihang natultulan sa kapulisan ang location sa duha, way swerteng nasikop ang kidnapper.
Giimbestigaran sa kapulisan ang kidnapper kung aduna ba kini psychiatric problems nga posibleng nagtukmod kaniya sa pagpangidnap. (CNA)
