Nipili nga dili nalang mopasaka og kaso batok sa common-law wife ni kanhi presidente Rodrigo Duterte nga si Honeylet Avanceña ang usa ka babaye nga sakop sa Philippine National Police – Special Action Force (PNP-SAF) tungod sa paghapak kaniya og cellphone atol sa kagubot taliwala sa pagkasikop sa kanhi presidente.
Matod ni PNP spokesperson ug Police Regional Office – Central Luzon (PRO-3) Director P/BGen Jean Fajardo nga ang maong lakang usa ka “personal nga desisyon” sa bahin sa pulis.
Matod niya nga giabaga sa PNP ang gasto sa pagpatambal sa nasamdan nga opisyal.
Dugang ni Fajardo nga hatagan usab siya og commendation sa iyang exemplary act in the line of duty.
Nakaangkon og dakong bun-og sa iyang agtang ang babaye nga pulis human sa pagkaigo atol sa komosyon nga nahitabo taliwala sa pagkasikop ni Duterte.
Matod ni Fajardo nga ang sakop sa SAF, nga wa niya hinganli, gidala sa tambalanan aron matambalan ang iyang hubag nga agtang nga naigo sa cellphone ni Avanceña sulod sa Villamor Airbase sa Pasay City niadtong Marso 11.
Dugang ni Fajardo nga ang PNP nigamit ug maximum tolerance sa pagpatuman sa warrant of arrest sa International Criminal Court (ICC) batok kang Duterte, nga gipaagi sa Philippine Center on Transnational Crime (PCTC) gikan sa International Criminal Police Organization (Interpol).
