CENTRAL VISAYAS- Positibo apan mabinantayon ang reaksiyon sa labor group nga Partido Manggagawa sa pagkatudlo kang kanhi Senador Francis Tolentino isip bag-ong kalihim sa Department of Labor and Employment (DOLE).
Sa pakighinabi sa Bombo Radyo Cebu, gipahayag ni Dennis Derige sa Partido Manggagawa nga sa kasamtangan, anaa sila sa usa ka “wait and see” nga baroganan alang sa performance ni Tolentino, apan dako ang ilang paglaom nga mapadayon na ang dugay nang nalangan nga labor reforms.
Matod ni Derige, adunay katakus si Tolentino isip usa ka abogado, kanhi chairman sa Metropolitan Manila Development Authority (MMDA), ug senador, busa dako ang posibilidad nga makahimo kini og maayong lakang sa ahensya.
Apan iyang gipasabot nga usa ka dakong hagit sa bag-ong labor secretary ang dinalian nga pagpatuman sa mga polisiya ug reporma nga dugay nang gipangayo sa labor movement.
Miingon si Derige nga andam ang Partido Manggagawa ug ang Nagkaisa Labor Coalition nga makigtambayayong sa bag-ong liderato sa DOLE aron mapadayon ug mahuman ang mga labor reforms nga nalangan sa milabay nga administrasyon.
Gikritika usab niya ang liderato ni kanhing Labor Secretary Bienvenido Laguesma tungod sa giingong kakulang sa pagpatuman sa mga rekomendasyon sa International Labor Organization (ILO), ilabi na sa mga kaso sa labor rights violations sa nasod.
Dugang pa ni Derige, usa sa labing prayoridad nga kinahanglang atubangon sa bag-ong kalihim mao ang pagrepaso ug pag-amendar sa Labor Code nga matod niyang dugay nang karaan ug adunay mga probisyon nga dili na angay sa kasamtangang panahon.
Lakip usab sa iyang gihisgotan ang pagrepaso sa wage fixing mechanism ubos sa Regional Tripartite Wages and Productivity Board (RTWPB) aron masuta kung epektibo pa ba kini sa pagtabang sa mga mamumuo nga makaapas sa nagkataas nga cost of living.
Gipasiugda usab ni Derige ang panginahanglan sa mas lig-on nga aksyon batok sa nagpadayon nga labor rights violations ug sa pagpanalipod sa katungod sa mga unyon ug mamumuo.
Matod niya, ang usa ka labor secretary kinahanglan adunay kasinatian sa labor relations ug “kasingkasing para sa mga workers” tungod kay ang DOLE gitukod aron manalipod sa interes sa mga mamumuo.
