Mikunhod ang gidaghanon sa mga child laborer sa nasod gikan sa 828,000 niadtong 2022 ngadto sa 509,000 sa tuig 2024.
Kini tungod sa gipakusog nga kampanya sa gobyerno batok sa child labor, sumala sa Department of Labor and Employment (DOLE).
Matod sa DOLE, kini resulta sa mas lig-on nga mga programa sa kagamhanan ug kolaborasyon tali sa lainlaing sektor aron mapalayo ang mga kabataan gikan sa mapahimuslanong trabaho ug masiguro nga sila magpabilin sa eskwelahan.
Dungan sa pagsaulog sa Adlaw sa Kagawasan, nanawagan si Labor Secretary Francis Tolentino sa publiko nga motabang sa pagpalambo sa lain pang matang sa kagawasan alang sa mga batan-on ang kagawasan gikan sa child labor.
Gipasiugda usab sa kalihim ang kamahinungdanon sa kolektibong aksyon samtang ang Pilipinas miapil sa pagsaulog sa World Day Against Child Labor 2026 ubos sa temang “Red Card to Child Labor: Fair Play for Children, Decent Work for Adults.”
Sumala ni Secretary Tolentino, ang maong tema nagdasig sa mas estrikto nga pagpatuman sa mga palisiya ug programa nga nagtumong sa pagpugong ug hingpit nga pagwagtang sa child labor sa nasod.
