Napalgan nang wa’y kinabuhi ang usa ka batang lalaki nga gituohang bag-ong gihimugso sa usa ka kanal sa Brgy. Paknaan, dakbayan sa Mandaue pasado alas 5:00 sayo ganihang buntag, Agosto 14, 2026.
Gikataho nga usa ka residente sa maong lugar ang unang nakakita sa maong bata ug matud pa nga pasado alas 3:00 sa kadlawon duna siyay namatikdan sa kanal nga sama og gilabay nga plastic nga puti.
Apan sa dihang nihayag na, nasayran sa mga residente pasado alas 5:00 sa buntag nga usa ka bata diay ang gilabay sa kanal.
Gibana-bana ang maong bata nga anaa sa walo ngadto sa siyam ka buwan ug gituohan nga bag-o kining gihimugso sanglit aduna pa’y sumpay sa pusod niini nga wala pa maputol.
Daling nanawag og tabang ang nakakita sa maong bata ngadto sa ilang barangay ug gi-respondihan kini lakip na ang kapulisan.
Sa pagkakaron, padayun pa ang gipahigayong imbestigasyon sa mga kapulisan.
