Pormal nang gisugdan ang konstruksyon sa kagamhanang lungsod sa Consolacion sa amihanang Sugbo ang bag-ong Municipal Jail niini nga nahimutang sa bukirang barangay sa Panas niadtong Martes, Marso 25, 2025.
Kun diin gipasiugdahan ang maong proyekto sa usa ka groundbreaking ceremony nga gitambongan sa mga dagkong opisyales sa lungsod sama ni Consolacion Municipal Mayor Teresa “Nene” Alegado.
Samtang gitambongan sab sa mga opisyales sa Bureau of Jail Management and Penelogy nga gipangulohan ni Jail Chief Superintendent Efren Nemeño, ang Deputy Chief for Operations ug uban pa.
Sa mensahe ni BJMP National Director Ruel Rivera pinaagi ni Jail Chief Supt. Efren Nemeño diin mitataw kini nga ang maong proyekto kay nagtimaan sa mahinungdanong lakang sa komunidad kay pagpatigbabaw sa hustisya ug paghatag og seguridad sa kadaghanan.
Dugang niini nga nipaambit kini sa dakong pasalamat sa opisyales sa maong lungsod sa pagpatuman sa maong proyekto agig lugway sa nagkadakong populasyon sa mga Persons Deprived with Liberty.
Ang maong proyekto kay nagbalor sa budget nga P180-milyones diin tukuron kini sulod sa 1.5 ka ektarya sa luna sa gipahimutang sa bukirang barangay sa lungsod sa Consolacion.
