Labing menos tulo (3) ka mga Palestinian ang namatay sa Gaza human sa duha ka managlahing air strike sa militar sa Israel, sumala sa mga lokal nga opisyal sa panglawas ug mga mediko sa Palestina.
Kini ang pinakabag-o nga insidente bisan pa sa usa ka ceasefire nga gipasiugdahan sa U.S. nga nahitabo sulod sa kapin sa lima (5) ka bulan.
Sumala sa mga opisyal sa panglawas sa Palestina, usa ka lalaki ang namatay sa usa ka air strike nga gituohang anaa sa usa ka sakyanan sa Khan Younis sa habagatang Gaza, samtang duha ka managsoon ang namatay sa Shujiaya, usa ka lugar sa Gaza City.
Wala dayon mohatag og komento ang Israeli military bahin sa duha (2) ka air strike.
Sukad nga nagsugod ang ceasefire tali sa Israel ug Hamas niadtong Nobyembre, kapin sa 680 ka mga Palestinian ang namatay sa Gaza, sumala sa mga lokal nga opisyal sa panglawas. Sukad sa pagsugod sa gubat niadtong Oktubre 2023, kapin sa 72,000 ang gitaho nga namatay.
Ang Shehab News Agency nga kauban sa Hamas nag-ingon nga ang managsoon gipatay human ang usa ka milisya sa Palestinian nga gisuportahan sa Israel misulay sa pagkidnap kanila sa Gaza.
Ang Hamas o uban pang militanteng grupo mihimakak nga ang managsoon mga miyembro sa ilang grupo.
Ang mga saksi miingon nga ang managsoon armado ug nakig-engkwentro sa milisya sa wala pa sila gitarget sa mga drone. Gikataho usab nga ang mga tangke sa Israel nagpabuto.
Bisan pa sa ceasefire, ang kapintasan sa Gaza nagpadayon. Ang mga opisyal sa panglawas nag-ingon nga labing menos 40 ka mga Palestinian ang napatay sa mga pwersa sa Israel sukad nagsugod ang gubat sa Iran usa ka bulan ang milabay.
