CEBU CITY-Nahisama sa piso nga nabasa ang mga pasahero nga nagdasok sa Cebu South Bus Terminal (CSBT) kagabii, Marso 26, 2020 sanglit wala nay bus nga mibiyahe.
Kini human usab nga mi-anunsyo si Cebu Governor Gwendolyn Garcia nga ipaubos na sa Enhanced Community Quarantine ang probinsya ug kung kini mapatuman, wala nay tugutan nga mga pampublikong sakyanan nga mubiyahe sa kadalanan.
Dali usab nga miresponde si Victor Caindec ang Regional Director sa LTO-7 sa naasoy nga terminal kung diin gipahibaw niini nga nagpadala si Gov. Garcia ug sakyanan gikan sa SMB tourist transport kung diin 8 ka bus ang muhatod sa mga pasahero sa ilang destinasyon.
Nasayran nga alas 2 palang sa udto nagsugod na pagdagsa ang mga manakayay sa CSBT hangtud nga naabtan kini sa pagbunok sa uwan ug pasado alas 10 sa gabii wala pa kini makasakay ug ang uban nagutman pa.
Diha usab mga taxi nga mitanyag og pakyaw butang nga wala nalang sitaha sa direktor gumikan na usab sa kadaghang tao ug mismo ang direktor wala kahibaw sa unsay tukmang solusyon niini.
‘Nalisang’
Daw samang nahadlok ang nagdumala sa Cebu South Bus Terminal (CSBT) tungod sa kataas sa linya sa mga pasahero kinsang gustong mupauli na sa tagsa-tagsa ka mga lugar sa probinsya.
Matud ni ni CSBT General Manager Carmen Quijano nga nangahadlok ang pipila ka mga pasahero nga posibleng ipaubos sa lockdown ang Cebu. Hinungdan nga mitambag si Quijano sa mga pasahero nga magpabiling kalmado ang mga pasahero sanglit wala pa nideklarar si Governor Gwendolyn Garcia og lockdown.
Subay niini, nakigsabot si Quijano sa mga bus operators nga mahimong makagamit og aircon ang mga bus apan kinahanglan gayud nga mosul-ob og face mask subay sa kausaban sa EO ni Garcia.
Sutaon pag-usab sa CSBT kung nahatagan ba og hinabang ang mga apektado’ng bus driver tungod sa ipatumang enhanced community quarantine. | By Gian Navarro
